旅遊: 2011/5/25-29 星馬行動 5th Day (Last Day)

2011/5/25-29 星馬行動  5th Day (Last Day)

2011/5/29 星期日 Last Day (Last Day?唔通我咁短命?....)

雖然勁唔夠訓, 勁唔想起身, 但早餐點都要食既..

這些酒店點都好過之前一間, 要試一試, 雖然唔係非常美味, 但都OK好味, 尤其係個沙津

馬來西亞的咖喱不錯, 尤其"咖喱鷄!"

沙律醬料都有"冰鎮"?

你唔好睇這"一pat野"咁樣衰, 這pat野非常美味, 涷涷地甜甜地重有些nuts, 我而家重回味緊佢既美味!

撈沙律一流!

0740 過馬來西亞及新加坡關

過馬來西亞關還算順利, 之後架車我們要全落客新加坡人員要檢查架車. 有D唔捨得何守信(我地個軍官, 佢話要留守到最後一個) 見佢隻手重流緊血, 流咗幾日喎....! 咁我就唯有頒個大洋荊勳章俾佢 (東X遊團章). 表揚佢既服務及英勇行為! 之後我地好依依不捨的離開咗佢..

因我地要取住一袋二袋已經狼狽不堪.
好啦, 過新加坡關...我見坐係度既關員 (四眼既, 黑黑實實, 廿幾歲, 女既...) 係咁問前面個隊友野, 到我啦, 佢講咗句好細聲既英文, 咁我就一定係至醒嗰個, 我一行埋去就以為好似入其它關佢地會問你係邊度嚟, 我就猛話 Hong Kong, we like Hong Kong, I like Hong Kong....點知佢又問我, 我又講多次, 原來佢問我這位大俠高姓大名.佢以為我唔識英文跟住佢就用英文同另一關員講我叫 Hong Kong..

喂, 一來你講到鬼死咁細聲, 二來我唔覺得你講英文發音正確囉! 重要行條又窄又九曲四十幾彎既隊, 我又拖喼又一袋二袋係咪玩先?

過完關落番樓下車站 (有公車) 等齊人就再上車
.

黃巴站. 唔該返大陸幾錢呀?! 返唔到大陸?! 唔係化?! "阿生, 這裡是Malaysia!"  "唔好意思, 一時迷路.."

上了車後就去到另一地方換車, 嗱, 話事人今次就做得啱啦, 我地唔可以俾人跟蹤到嫁嗎! 應該換埋個車牌, 噴埋架車既顏色就重好. 等了一陣, 終於見到新的新加坡軍官, 這次是個女人來的, 年齡稍大. 但一睇就知係精明眼黃老太.

08:40 終於出發去環球影城, 但唔通個天唔鍾意我, 玩機動遊戲先嚟落雨?! 重要係大大雨. 新軍官就好醒話而家落就啱啱好, 吓, 你講d咁贈慶既嘢你唔驚有人郁你呀? 原來佢擺個羅庚出嚟 (係咪指南針嚟嫁?) 合指一算就話恭喜我地, 話我地到嗰一陣就會停雨. 咁我地就信佢一次, 佢話風水佬呃你十年八年 (依, 你係咪? 哦, 你係風水婆唔係風水佬!)

到達後都係無落雨喎! 即刻跳番part求雨舞先! <--係咪玩野呀!

一出停車場就到聖淘沙名勝世界的賭場 "我地係地下，即係地下賭場囉!" ＂你唔好亂講，人地係合法既.."地下賭場＂＂

綠色通道唔洗報關, 紅色要 (紅色係本地人要俾錢入去, 綠色係遊客, 出示護照就免費)

"如果出示新加坡護照呢?!" "你會俾人怒啤街道囉!"

賭場門口有得免費派飲品, 唔飲咖啡可以飲阿華田， 我緊係唔執輸，執翻個贏飲杯啦。d阿華田重好似唔洗錢，沖得好濃..正! "請問有無頭條同AM730派呀?"

我同個隊友講一陣食午反再來過，到時食反 (食反--讀廣東話既玩) 唔洗買野飲! 但食午反時當然發覺無啦!

我地先係賭場外餐廳那邊集合去廁所... (係集合,同去廁所無關!)

廁所外面既儲物櫃 (有中文字喔!)

唱錢既 (今日人民幣中間價...嘩，Ｄ坡紙重貴呀!) 只食餐反, 我唯有黐隊友既坡紙用 (當然食反要俾錢啦!)

搭扶腳(手)電梯上一層行去終於見到今日而且係軍隊最後一個亦係最重要既軍事設施-->環球影城!

去到門口，每人派張通行証及要視網膜掃描 (手臂要印印水紙--印個印，但這個印又稱國王的水印，佢唔同紫色的紫外光印, 係無色無味的, 紫外燈都照唔到! --咁咪係武俠小說既毒藥囉. "無毒嫁!" "咁即係無毒既毒藥啦.."<--被佢吹到啤兩聲!

佢要用部特制既手提八達通機 (你估輕鐵查飛呀!係手提驗水印機) 驗過, 才準你地出入基地，如果少了通行証及防偽印，都唔可以返回基地!

反而有樣東西佢無理，就係新軍官講只要你唔係大模斯樣, 你搵個袋袋住 (你唔好話你取個透明膠袋呀, 如果係既話你只好祈求門口嗰個係盲的或者你到時义佢雙眼..) 袋一百幾十支水入去，佢都唔會理你個多啦Ａ夢百寶袋的..

環球影城的票 原來那個票尾換飲食及禮品那個優惠已經完結啦!

"我就係為咗那幾蚊新加坡紙來的, 你話俾我聽優惠完結?! 有無得退團?" "得, 你自己一個買機票返香港.." "係咁當我無講過. 依, 你睇下後面, 好似有UFO飛過喎...." (當然係作嫁啦, 你咪又當真呀! 傻仔嚟既..)

環球影城我來了!

係咁一入去就係星光熠熠的荷李活區, 那裡見到個掛住打功夫，幾年無沖過沖既功夫熊貓 (唔係佢條褲, 係下面白色的毛毛部份都已經黃了..) , 定係佢係亂馬既父親唔掂得水?, 科學怪人, BB鳥, Betty... .Bitney Spears (這個無), 但他們都係隨機出現的!

幾年無沖過涼已經黃咗既功夫熊貓..

之後就順住時針玩先馬達加斯加(荒失失奇兵)來船仔勁多人排隊! 點解要在最後一日星期日玩環球城呀? 排咗成40分鐘呀! 以為就咁坐船仔好似香港迪迪尼小小世界, 點知又唔係喎, OK喎!

一入去就見到有個士兵被吊在樹上, 真係好得人驚, 而家想起，日頭重好驚, 夜晚呢? 夜晚食完飯睇完電視就訓啦，邊得閒! <--俾佢Cheers! (唔係加油，係啤一聲呀!)



我們的採險船，出發前工作人員還會向我們致敬!

破船既入口

跌落來的箱子

因為船內既動植物都會"郁" (相機用了運動模式, 但有些相都有些朦）

停下來再影就清多了 !

獅子阿力

Help me! Help me!!

洞房花燭夜? 原來佢地陰謀對付阿力等人(動物)

人地煮你來食，你(中間細嗰隻)重跳舞跳得咁開心??

攪鬼狐猴

又一攪鬼經典--企鵝!

很得人驚的岩石怪, 口會噴火!

俾佢吞落肚啦...!!

原來又係那些狐猴攪鬼!

岩石怪肚內周圍都係岩漿...

經過這個瀑布前有 97%隊友驚呼重用衣服蓋頭, 其實船一行到埋去就好似銀行一樣--"關水喉"!

咁嘆?

見完這隻係飛機上既攪鬼企鵝就探險完畢了!

每個場境樂園後面都有間手信店

之後就去咗睇史力加4D, 入到去, 取副3D眼先!

首先要企係度罰企聽佢講野, 後來才入去睇.

都OK, 但全程英文, 無字幕, 如果提供耳筒翻譯就好D, 雖然識聽聽地 (太快時聽不到) 但點都無用自己語言那麼好.

進入史力加的＂遙遠王國"

見到個皇冠再見到史力加個樣就係史力加４Ｄ影院外面

內部很多人睇佢地講野，因見不少人在這裡已戴了3D眼鏡... 但我重申一次，這裡不是看3D的,
這是開場的介紹.

一會門開了才入去看4D (其實比起3D, 4D只是多了那些噴水，吹風及有些電影會有椅子動起來的情況), 而且為了安全就算小孩都要佔一坐位 (孕婦就要小心自己衡量看不看了), 我見呀baby (我隊友個幾歲個真baby) 全程遮住隻眼, 有些小朋友可能會驚, 如果嚇到哭就唔好!

注: 睇完佢無人睇你有無放低副眼鏡嫁! 你地俾人拉咗唔好搵我!

雖然好得意, 但我地無買野, 因為邊夠時間呀!?

本來我係香港已經買咗件避彈衣 (雨褸咋!) 點知隊友話驚失身 (濕身) 喎，所以我地路過失落的世界的豬蘿記(朱羅紀公園區) 就繞路而行去了睇那個未來水世界表演

睇表演有時間限制12:30, 14:30, 15:30，我們看了12:30那場

因只有最後那些欄杆後的紅色區坐位才不會失身 (濕身) 的, 中間綠色係半失身 (即間中有些水射你）, 前面全失 (即係水世界既水上電單車會定彎Ｄ水會飛向你或直接用水桶向你淋水..你想避都無得避. )

但你唔好以為無人坐最前，Ｄ小朋友就最鍾意玩水啦, 反而唔見曬佢地Ｄ阿爸阿媽...正所謂爸媽本是同遊客，大水淋頭各自"young") 因為多數阿爸阿媽都驚失身 (唔係一早失咗咩?! 點解咁驚?) 所以大家都爭坐紅色區霸頭位,

我地就早了半個鐘入場排隊啦! 順便講講，排隊那邊有VIP區的, 我想是那裡酒店的住客吧! 不過你幾VIP都好，一入到去我地已經見到有人坐咗係度, 一係我老花見到Ｄ唔應該見到既野, 一係佢地咪係 PIV 囉, 即 Personal Important Very (非常重要既自己人) 囉!

這表演都多人睇嫁, 重會做人浪添，不過又係全程英文...　

D鬼妹仔完全唔怕濕身, 但Ｄ阿爸阿媽唔知走曬去邊, 一陣要去失物認領處認領番佢地阿媽阿爸

1.爆炸!

2.淋水 !

3.跳海!

估唔到我地中國人興一哭二閙三上吊, 佢地外國人重激, 要一爆二淋三跳海!

感覺這幾架係爛船，好易沉..

英姿烚烚!

突然飛架水上飛機出來，但係著火既? !

爆到七彩，爆到周圍都係煙!

出面既模型船

總括來說，可能我已經睇得太多這類表演, 泰國的占士邦show,（可能係第一次，又坐得近，很震撼！）番禺長隆的 (不是馬戲，但馬戲勁好睇! 機動樂園內的表演都不錯!)

華橋城及這次水世界本人就覺得很一般. 但你話死唔死? 華橋城的類似表演我重覺得好睇過佢...

完全無劇情, 只是不停跳水不跳爆炸..比較悶,..而且可能前面有濕身的可能, 所以坐位設得後離舞台遠唔好睇..直頭想半途走人!

如果你睇過其它類似的我勸你玩多幾個機動遊戲或用時間買下記念品好過,你未睇過類似的當然例外可能會覺得好睇既....

過咗迷失既樂園我地就去到古埃及區

我很期待那個木乃衣室內過山車 "盜墓迷城的木乃伊復仇記＂

好啦，因隊友有小孩, 所以只有我們三個敢死隊隊員入去,

我們在門口見不到人排隊，見門口顯示個５字我們就衝入去..

原來裡面黑麻麻勁大, 在裡面先見到人龍...係見唔到個頭! 咁得人驚! 係見唔到個隊頭啫...轉了十幾次彎，而裡面又唔多夠冷氣..已經係裡面排了三十幾分鐘 (後來想想下出面係寫大約等50分鐘!!)

我又開始嚟....肚痛呀，你地又想咩呀?! 吃了幾粒藥都唔掂, 唯有同隊友講如果我有機會的話會回來，我見佢地表情都知佢地實以為我臨時拗底唔敢玩要出去, 不過我真係肚痛呀，唔理三七廿一原路出去, 出到去急急找廁所，攪掂！

我都有想過入唔入番去同入番去佢地可能已經上咗過山車，不過我話過會回去就要回去。我心想我出來時困難重重 (太多人阻住了) , 點算???

我抬頭突然見到中間有個牌寫住 single rider, 我就問守門人我有朋友係裡面，佢就話我未必見得到佢地，我就話就算龍潭虎穴我都要去，因有隊友等緊我!

佢就俾我入啦, 中間single rider 這隊可以話無人排的, 我去到最頭才見４個人，而我終於見到我隊友, 差不多到他們玩了，幸好我這隊入! (如果唔係我要打十個都唔掂! 因裡要太多人了!)

(大家知道這漏洞後點做我唔知啦, 去到最頭時大家唔好眼神交流唔好交談...或講句 "喂, 到你啦!" --依, 你講廣東話既, 咁咪又比人知囉!........) 但真的未必可分到同一架車一排的, 自己衡量下啦, 做特工既原則, 我咩都唔知, 我咩都無講過...)

都OK刺激既, 佢同香港迪迪尼既飛越太空山既分別係佢會倒後 (記得只有一下). 我覺得反而無飛越太空山一部到位既好玩...而且要排50分鐘....

出來大家都說餓了要去食午反就出樂園了.

出樂園時見到的科幻城市既超恐佈的全球最高雙軌交錯差D會撞既紅藍過山車 "太空堡壘"

(比長隆那個還要恐佈, 當然比東京富士急那個高啦 (長隆那個係亞洲最高落差, 望落去斜度成 90度...)

 女坐紅, 男坐藍色... 紅色的人類戰隊-- 雙腳掂地, 藍色的機械戰隊--雙腳離地,懸掛式,

但聽聞紅色那個雖然掂地但是是更恐佈的! 因為聽聞安全帶只在你大腿上, 身上無的, 你都咪話唔驚成個人抛咗出去! 我無試過啦, 你地試完話我聽..)

科幻城市

經過完科幻城市入番紐約區, 這裡主要係影相同街頭表演

 

有得借bb車, 而且有泊車區

好大粒珍寶糖! (唔怪之得叫珍寶 Jumbo!)

最左面那個類似電動輪椅, 我見個阿婆楂住橫衝直撞, 佢就好開心, 我地就好擔心! (擔心佢, 都係既, 不過擔心佢撞過來多D!)

去番荷李活區出番門口食野 我們選了 Toast Box

跟餐必有半熟蛋

喇沙 辣辣地 不過我覺得一般

跟餐涷飲只有薏米水唔洗加錢

這個不是花生醬, 辣辣地有肉的不清楚是甚麼醬 (麻麻地)

我覺得這間 Toast Box 雖然多人排隊但麻麻地, 但隊友就話個咖喱鷄唔錯!

而且有一段小插曲, 就係個收錢員 (又係四眼女子, 唔通新加坡既四眼女都麻煩些? 我地用英文加國語同佢講, (係分開講, 唔係一齊, 佢都聽唔明, 唔通要一齊講先明? 佢重越講越勞氣, 我就見條隊越排越長, 好彩佢隔離個男職員見到佢講唔掂就過來幫下手..買幾個餐買咗先廿分鐘, 好似鬧交咁)

咩新加坡人D英文同國語真係咁好咩? 我就唔覺啦,..覺得佢地英文發音仍然未全改到新加坡式發音, 而且唔知點解佢地係咪好似日本人一樣以為高人一等, 真係懶得同其他外地人溝通...坡元實在太貴了.. 又唔俾我食香口膠 (香口膠有好處嫁, 就係鎮靜同集中精神, 上落飛機幫手中和耳內氣壓..等功效, 職業特工重可以用來爆破....<--咪又巔!), 我想我未必會再來及不會推薦人來!

我一個人叫了兩個餐吃, 吃了$11坡紙, 大約$六七十港幣, 樂園內都預咗啦, 不過只是午反就覺得偏貴了!

食完飯再返樂園

對岸影番埋去既過山車及古埃及景

之後就有團友去坐旋轉木馬..點解勁耐都唔見隊友? 原來木馬又係要等....見到佢地都等廿幾分鐘先有個騎..

靜止時影一張

同團友baby木馬旋轉時影的相 (這個竟然都多人玩, 他們排了都廿幾分鐘..)

坐完木馬隊友話去坐小飛龍過山車, 我就決定離隊  (那個樂園內第二激的木乃衣過山車都玩過, 小飛龍算了吧!--後來這決定是正確的, 因隊友話不好玩, 只是轉轉轉)

我就同另一媽咪隊友同佢小baby 去紐約區睇史匹堡電影特效片場, 但媽咪話驚阿女驚喎, (一來啦, 二來我想佢掉下老公一個唔安樂) 後來佢地走了.

我本來想排第一行的, 點知職員叫我排第三行 (原來入到去就係最前的第一行) 個show大約十幾分鐘, 史匹堡係個螢幕講咗幾分鐘, 我重以為佢會係螢幕爬出來, 這些先係特效, 無喎, 有D失望..

之後去另一間房場境係你在一間類似工廠或屋, 有部電視望出出面係維多利亞港 (是但一個海) 你屋既窗被風吹走, 唔知點解間屋又倒塌, 個海又著火, 然後又有架鐵達尼(唔知咩大船) 衝入來
!
OK既，不過如果觀眾那邊的天花會掉下來及地下會搖就更好啦 (觀眾企得太隠陣，勁難有共鳴!)

睇完要回來吃東西附近集合坐車到機場

加多兩幅魚尾獅塔的照片，後來才知樓高十二層的它可以俾人入內參觀的，没去到....

17:50　到了新加坡機場, 嘜唔係軍用機場，去咗樟宜機場既?

話說因為要放回東西入個特工喼，check in 機位時唔小心掉了條鎖匙, 你知啦，特工用既喼都堅硬無比，唔係咁易打開。。　好彩新來的女軍官，我都話佢精明眼嫁啦，佢一睇睇到就還是給我，重勁過黃老太! (要給個讚這個新加坡女導遊, 你唔好睇佢年紀大了點, 但全程佢都很醒目!)

check in 後就帶我們到取青ＢＢ既班蘭蛋糕，雖然幾鬆軟，但比香港的貴多了，所以只是試食過就算.

阿話事人 (領隊) 就送了我們每兩人 (我就有一件) 既勁大既咖喱角 (有我半隻手掌大!) 食完勁飽!

重有時間, 有個女隊友柺走咗阿Ｂ (佢家姐帶咗佢去機場既室內兒童遊樂場排隊玩), 但將近夠時間去集合上機，阿Ｂ都未排到玩要佢走佢梗係唔肯要同你死過, 一於出動佢最勁既秘密武器－－喊!

睇佢喊到就聞者傷心見者流淚 (佢喊定你喊呀?) 但無辦法要去閘口集合，而且閘口頗遠, 唯有脅持佢上機, 睇佢喊到塊面紅曬個小嘴都歪埋，我就出動特工對付捉到人質既武器--朱力古百X滋! 佢即刻收咗大半，果然現實...

阿媽開了俾佢，點知就出事！

上機前唔可以帶任何開了口的食物，係咁阿媽就猛派俾佢身邊既人食...天呀, 剛剛先食完勁大咖喱角咋! 但見阿妹食得幾開心，算啦! 幫你啃幾支.

話說樓上Baby 阿媽佢既隨身武器 (正所謂劍在人在，劍亡人亡－－佢帶咗把比Baby食用即較剪入禁區）

(我對咗你幾日，都唔知你係拉登既二五仔<--講笑!）

佢唔記得取出來放回喼帶上機，X光一查佢個肺有陰影--体內藏毒 (武器）--係個袋內照到危險品，就捉咗佢埋一邊夾佢手指，錐佢鷄心, 一路問佢一Ｄ問題  "你阿爸係邊個?" "你阿媽係邊個＂＂你係阿爸生定阿媽生?＂（這一定係IQ題，答案係兩個都有份＂＂你小學係邊間＂(Face look問題?!) 然後又重覆問 "你阿爸係邊個?" "你阿媽係邊個＂＂你係阿爸生定阿媽生?＂"你小學係邊間＂...重覆十幾次證明你無講大話, 而且拉登都死了，只剩下拉柒, 那檢查員只問佢去到香港機場是否取回就放了她回來.

(當然只是有她不小心帶了較剪入禁區被查出來及問了幾句的環節啦，新加坡應該唔會用酷刑的, 打藤除外)

而且講真我一個人全程都多得隊友多多照顧, 我很感激他們!

很累呀, 為甚麼班機這麼久都未起飛?  原來早了入禁區? 不是嘛?!

在機上今次食鷄反啦, 不錯, 還可以. 今餐吃光啦..

機上不停睡下醒下..

大約2315 到香港機場

一開電話有幾個訊息..除了找我收數的, 還有阿爸問幾時返到?  及之前另一個在泰國執行任務的朋友找我, 我重以為佢俾人捉咗, 原來佢返了屋企.

2340 取完行李就再見了, 幸好還有裝甲巴 (巴士) 回元朗.

完啦, 甚麼都完啦!


"XX少校, 你其實死咗 (訓到死咗), 你有5日時間, 我地要你執行個任務..." (嘜咁似電影源代碼 Source Code既?)

報告長官, 5日行程全部行程報告完畢, Sir!


後記: 那兩個女傳訊兵係無俾返那些馬幣我的, 這點我有時失望, 不過我想想可能佢地以為係何守信軍官給了..算啦!

還有那個柑桔飲品雖然少貴, 但幾好味同對喉嚨及咳都幾好呀!  (佢話有消脂功効, 我就覺得重加重OK啦)

我無取到個團袋, 原來東X遊個團袋幾"令"的!

個團我俾65分啦, (吓, 之前康X, 永X我俾唔合格嫁! 關X 同 星X 無論好玩度同態度我俾75分以上! )

有朋友問我點解個遊記無出我自己D相既? 本來我都考慮個這問題想係最後一日出, 但唔好啦, 比大家心中一個美麗的回憶啦!  (你驚你寻仇咋!)

以上報告純粹 搞笑, 如有得罪, 請多多包涵!

而且不好意思, 咁耐先打完, 以後還會有報告

預告:
是團購, 淘寶, 飲食, 電腦及其它的不定期檔案, 會存入F檔案 (Fung檔案), 這些比較短篇, 大約二三天會有一篇.
記住得閒上來看看 或 在我博客右面填 "Follow by Email" 或 "RSS" 都可以呀!

謝謝大家主持! (係支持呀! 謝謝!)