Fung's blog: 2011年6月5日

2011/5/25-29 星馬行動

前言

繼上次 "遲來的一個傻仔布吉遊記" 的鐵掌水上飄在泰X營(對不起!以為絶咗版... 我以為Photobucket刪了全部相,原來我之前的遊記重係度, 謝謝!) 發表廣受大家歡迎後, 很久没寫遊記了, 今次都算係嘔心 (無錯係嘔心)瀝血的史詩式巨作<--得果5日, 你唔好誇D! 如果史匹堡再世(佢未死嫁!) 都可能搵我寫豬囉記第十集既劇本 <--關咩事?!...邊有這麼多集? 最多找你打雜買咖啡奶茶掃下地, 鬼搵你拍, 低能!

未出發前

話說我不嬲都唔鍾意跟團, 但無辦法, 個假取得太急, 取1日放5日, 阿頭都咋我形, 話唔夠人手又話我取得急(我有21日假嫁,你想幾時俾我放?...唉....無言.....), 但我今月唔攞, 如下月攞, 擺重多日, 我7-9月應該都唔會去旅行(避開暑假高峰期), 所以拼死取假, 目的地一係日本北海道或大版(趁佢平), 一係星馬, 泰國去得太多次了, 停賽. 想咗兩日, 東京去過, 星馬完全未去過, 就星馬啦! 太趕找不切資料 (自由行我最少3星期找資炓, 除非係去慣去熟既泰國就不需要) 找不到人了, 一於一個人跟團! 一個人去旅行都慣了

團費:HK$3989

香港機場稅:HK$120
機場保安稅:HK$33
成人海外機場稅:HK$260
機場保險稅(成人):HK$40
燃油附加費:HK$751

旅遊保:HK$171
(這個我見有D人真係無買, 但其實唔慳得, 因有起事這個費用可以天文數字, 我見過真係有人去旅行時中招, 所以去得旅行呢幾百蚊, 算吧!)

燃油掠水費竟然要HK$751,算啦,豪俾佢!

總數:$5354 (唔三唔四-->$5364先啱)

距離出發大約6天時間,倒數中.... 係咪以為睇緊24呢!

唔該再想像下或播隻占士邦音樂來看開場...

買定00X專用的電風扇, 太陽鏡, 太陽油(其實無買,之前有,０翕下啫), 那些夏桑菊, 清熱嘜都帶齊..

2011/5/24星期二

19:30 返緊工, 但重未有通知明早幾點邊度等...好彩影低了張藏寶圖(報團資料)放在家,即刻打去問老媽子個報團no, 一打去就接通了,有個男人接話:"密碼"(幻想中, 其實係身份證號碼), 目標地點"新加坡"(問我係咪飛新加坡?) 我心想話"你又知" (這些行動都係莊重D好), "係", "你既行動代號係 SQ859, 集合時間0815, F地區, 不見即散(這句我加的)"

收了線, 我就"突然好醒"(唔知你地係咪都認為我好醒), 我參加行動(報團)時只給了我 FBI的証件(護照), 無給過我自己証件的密碼,而且參加行動前明明話頭一天行動地點係馬來西亞, 為何變了新加坡?? 我唯有再打給我助手(老媽子)問總部(旅行社總行)電話.
當時 20:45, 係咪好緊張刺激呢?.... 哈哈..因為總部及支援都關22:00, 有無搞錯, 這麼重要的機關不是24hrs! 講笑.. 今次有位女士回答:"x先生, 一人行動, 係咪?" "係" 我就安心收線了.. 後來我助手(老媽)又打了去詢問, 真是辛苦了 (東X遊職員)

後來記起有個同事有個行動在泰國, 於是就打去問明天是否一齊食早餐, 點知佢話05:15集合, 噢..即刻想收線....
最後都講咗句"祝你行動成功!香港見."

放工回到家已經00:00, 印了2個行動資料(馬六甲那餐唔包及環球影城行程) 及執少少行動所需物資就睡了..

2011/5/25 星期三 1st day

一早起身,

07:00 懶醒走去搭吉普車(邨巴)心想唔洗拖住物質行動, 點知..

到轉車站轉了架裝甲車(無錯, 係裝路人甲的車, 即巴士) 點知物資架已放滿了物資, 而且要企, 有無搞錯! (高八度講)
行車大約1個多小時, 終於到達行動集合地點見到話事人(領隊)分派了今次軍機機票(即機票), 行動目標(行程)及通行証件(團章)等,她說每次行動最好帶住這証件以識別, 我心想這咪很易洩露身份..(其實好樣衰), 靠認人安全D.

講好了集合地點時間, 正所謂 "三軍未動, 糧草先行" 去食個早餐先! 問了詢問, 大X樂要入了禁區才有, 如無咪大鑊!? (請各位人士告訴我究竟禁區內有無?) 走了去大X活, 見到多人及好像比出面貴, 就膽粗粗走了食美X, 你知啦, 美X, 除了燒味飯外, 其它我中伏唔少次(包括難食, 唔熱..) 但今次的早餐食了$25炸魚柳＋炒蛋(因瑞午節前食了幾日"傻", 再食糯米雞的話唔得掂..) 估佢唔到又OK喎.

外脆內軟呀!

而見到隻$1蚊雞都幾多人買(係$31蚊先啱). 應該唔錯.

入禁區前見到個腰包唔錯喎, 我搵咗好耐先找到這種是是正正(正長方形或正方形款, 除了Portxr), 而且價錢 OK, $268, 正所謂踏破鐵鞋盧覓雪(無覓處) 得來全不費工夫

過關時我望了個關員一眼, feel到個佢眼神同我講 "祝你行動成功!" （係時侯食藥啦!)

10:30 我就係搭這架軍機起飛了

嘩，不得了，去執行任務其中一國家的邦女郎(空姐)靚到...同韓國空姐唔同靚法(而且韓國有無再造人兵器唔知)，有７成空姐都好靚(而家Ｄ空姐水準下降，有７成很高了!)，有個似Suki,
有Ｄ可選港姐!應該靚過港姐..

這架軍機(星航), 不錯，而且就算經濟倉每人都有咕荀，毛毯，重好過X泰, 而且如有童軍或老軍人(小童或老人) 的話他會很細心先貼張貼紙在他們頭上(其實是在椅上，你地唔係信貼頭呀，
玩緊非洲話事啤咩!) 食餐時會先給她們及給小童兒童餐. 十分體貼. 當然唔少得椅背上的電視機啦.

派發軍糧時間有東方餐及國際餐，第一個邦女郎來, 我見個國際餐幾正, 唔係個邦女郎，唔好想錯.., 但個邦女郎話等等，後來再來一個邦女郎用國語問我之前係咪問了我要唔要餐? 我話係，係咁佢話倒杯飲品俾我好唔好，見到咁靚的邦女郎差Ｄ唔記得阿媽姓嘜，不過最緊要記得阿爸姓嘜。。後面那女的就話我講咗要國際餐,靚Ｄ那位就輕輕拍了我兩下(唔通係暗號?)笑笑口講我唔講俾佢聽,唔通見我靚仔? 定係我戴住超(太曬了，戴住超睡覺) 以為我係蔡X華(肥肥地有幾分明星面), ＂絶對空虛，絶對空虛。。＂定係以為我係傷殘人士(盲)? 我想後兩者居多.

經濟倉餐牌

大佬(注:人地靚女空姐來的,不是你大佬)你誤會左啫! 好啦，佢之後笑笑口話魚餐好好食好，好好食..佢差ｄ未係我面前搖鉈錶..又問我"不用謝"點樣講,我心唸不用謝就不用謝了，甚麼點講？？而家想番,應該係禮貎地吻一下佢面額，說不用謝了..想下啫! 唔係唔得呀?! 是但啦，靚女話咩都好食，就給了我魚餐, 點知我錯了,個魚好腥，其它配菜尤其個沙拉勁酸,（唔知係咪變壞咗..) 個餐本來最正的H字頭雪榚又一早取來唔夠涷溶溶地。原來國際餐一早派曬, 早知叫雞...餐(東方餐除了魚還有雞選) 啦!.. 記住飛機餐唔好點魚，我食過無論咩航空公司 (包括X泰)都是很難食的..此單case還有後著..其實由細到大我都唔知邦女郎係咪有分忠奸嫁? 有無人話到俾我知?

我中咗招的魚餐!

14:30 到新加坡樟宜機場

要坐Sky Train去另一閘口呀!

有椅坐

退稅

熊仔警察, 其實係咪有人係入面監視我..

都有幾多香港熟口熟面的鋪頭

幾舒服.. 但我唔可以係執行任務時這麼無防範的睡著 , 睇睇就算了.

吸煙室

原來要VIP先可以打機..

這部特務專用車, 好似幾好玩喎..

很多香港見慣的鋪頭

啱曬細路仔

百萬富翁大抽獎, 我一路影一路見人入收據到抽獎箱 !

見到有Donut買呀。。但比香港及泰國的貴很多..而且無星加坡紙..有得睇無得食...

15:15 轉內陸機去馬來西亞

要過多次關檢查多次，這次那度門 (金屬探測器)不停叫..差不多每個都叫(係部機，唔係d人叫), 入去坐定定等成大半個鐘才上機, 突然有Ｄ肚痛,我唔通中毒...個飛機餐...吓!原來那候機室內無廁所! 去廁所，要出外面..但已安檢及撕了機票尾..唯有聽下歌分下心..

好啦,終於有廣播，好像不是我們的機..見Ｄ隊友(團友)無反應, 再聽一陣歌，一抬頭,嘩!無曬Ｄ隊友及唔見埋個話事人, xxx! 即刻追上去! 一追上去後面就有人拍我, 日光日白唔好玩啦...!!
原來係有兩個靚女(講廣東話但不是大隊的)話俾我聽我跌了個腰包..So Nice!

忍到上機第一時間唔理三七二十二衝去廁所, 但唔知係咪忍得耐又去唔到..(你地唔係以為這樣了事吧...)

16:35　架叫 Silk Ａir 的內陸機起飛前那播電視教著救生衣的電視不停又起又落,祈定禱 (點解?->一係撞邪，一係架機有問題..) 好好彩，架機竟然起到飛!

起到飛就嘆翻杯茶先, 佢地係咪都找張紙墊底..

17:15 安全著落馬來西亞機場, Thanks God!(咩God都好啦,都要多謝下!)

又幾好喎, 用單車又環保又方便

個機場好似重靚過新加坡的..

問鋪頭問口很多公仔呀!

排了條超長又超慢的人龍(領隊話馬來西亞的人做事比較慢),來到Counter前要紅外線掃視網膜(對住關員打兩隻中指...兩隻食指才啱!你被人拉唔好話我教)點知佢話唔洗打, 唔通佢見我靚仔,還是知我來執行任務(振興馬來西亞經濟) 唔洗我打..??

超長的人龍!

過了關想取行李但在個電視機(電腦屏幕)前呆企搵來搵去都搵唔到自己班機, 但feel到有d野飄埋來，"先生...." 我一望一身紅衣(黃衣)既少女,我先睇下有無腳..好彩..有..用國語講"請問廈門飛馬來西亞那班機是那條行李帶取行李?" 她可能不太識英文，我就用唔鹹唔淡的普通話話俾佢聽係７號, 又一美少女噢! 今天異性運很強噢! 老師說得無錯, 要多學幾種語言! 算命的算得無錯，我的愛情及事業運都是要多出國的..唉...偏偏就係少機會出國...做物弄人，天妒英才! <--大吉利是! 無咁快新年!

勁奇怪見到自己個喼, 但那電視機還没有顯示, 唔通知我係..., 同機即刻國家級禮遇特快服務?

見到話事人, 原來佢話手指模機壞了...所以打唔打都照過關....
集合了幾個隊友, 話事人就問誰要做通訊兵(買電話咭呀!),
為了大家!(其實為了自己打番屋企) 我同2個女兵(大學生)就奮不顧身, 易不容遲, 義無反顧的舉手

她說要接應(接我們)的人員--即當地導遊已經在出面, 你地先出去, 我就同幾位隊友出去找他.

嘩, 人海戰術呀! 出去勁多人, 個個望住你, 小生怕怕...應該係心口插支玫瑰以識別嘛, 咁都唔識,激死..! 你地話係咪?
好彩佢都算醒目, 比我差少少啦, 有個男人走過來, 嘩! 靚仔來的(佢後生時我想會係), 明星相, 何守信!

佢就帶我們到附近一間物資店(電話咭公司Digi)買, 我說我們彈葯不夠(未唱馬紙), 他就說先借50發彈葯(50馬紙)給我,
電話咭賣20馬紙,內有5馬紙用,足夠幾次打回香港緊急通訊(打回香港報平安),我本來要30馬紙電話咭連費用,但2個女兵話佢地唔夠用,是但啦, 做男人要讓下人...點知...唉...
講番買電話咭過程, 佢要登記一個FBI證件(護照), 之後佢幫你既通訊設備設定(即電話囉)!

完成後第一時間打回香港總部(打番屋企)報告大隊已平安到達目的地, 報告完畢, Sir!

接待我們的軍官(導遊)說今天辛苦大家了, 所以先慰勞大家一起去刷番餐.

出來集齊人, 分別搭升降機落地庫(一架裝唔曬), 落到去不見了部份隊友...唔通這麼快給敵人繊滅 ?!

原來升降機分兩邊,落到地庫不可互通...........
再搭多次上去由另一邊又落番去囉....

又有一接待身形健壯的軍官等我們(旅遊巴司機), 先行個禮, "早晨", 眼神一接觸, 我都回了句"早晨" (5點幾6點早嘜鬼晨!!)

上了裝甲車(旅遊巴)一開車無幾耐...噢...肚子攪下攪下, 個飛機餐.....
想食藥, 但無水, 未買!....這麼大整蠱! 再來唔理三七廿二, 照啪DXC的蔬菜丸,(蜂膠,速X靈,蔬菜丸對成日肚子不適的我很有用) 用牙咬囉!
得幾滴口水, 成口都係粉, 好dry, 無計! 加上播下音樂舒緩下...

終於忍到食中餐餐館, 那時還OK. 分派了我坐位後我同兩個家庭(大家庭兩姐妹)一齊, 兩個女女還有一小妹妹, 那小妹妹後來去到邊都要Baby Chair, 很可愛.

今餐的伙頭大將軍可以用很差來形容，所以大家都無咩點食，我都費事影相..我想都是食乾糧吧，好彩有帶餅乾!係咪好醒呢? 贊!

上裝甲車前本來想唱番D錢俾個導遊順便買支水, 點知佢又借多50馬幣給我...唔通佢係軍中的經濟部--->放數?

食到咁上下去埋個廁所, 再上裝甲車回軍營 (酒店)

食完番軍營, 我地73X旅(黑太陽73X?) 扎營營地名叫 Holiday Inn, 佢話係新營地, 但我睇過唔多似, 不過都唔係舊.